Молдахмет Кенбаев – қазақтың алғашқы кәсіби суретшілерінің бірі, кескіндемеші, педагог, Қазақ КСР-нің халық суретшісі, Қазақ КСР-нің еңбек сіңірген өнер қайраткері. Оның туындылары Қостанай облыстық тарихи-өлкетану музейінің алтын қорына енді. Ол 1925 жылы 25 шілдеде Қостанай облысында дүниеге келген. Оның көркемсуретке деген дарыны мектепте оқып жүрген кезінен байқалды. Молдахметтің балаң суреттері түрлі көрмелерге қойылып, газеттерде жақсы пікірлерге ие болды. 1948 жылы Кенбаев Алматы театр-көркемсурет училищесін, ал 1956 жылы Мәскеудегі Суриков институтын бітіреді. Бояуды ұғына білу, әсемдік пен серпінділік тәрізді кескіндеме тәсілдері, өмірді қадағалап, көре білуі - суретшіге тән осы қасиеттердің барлығы да оның «Кітап ұстаған қыз» картинасынан көрініс тапты. Картина музейдің қор жиынтығынан алынған. Сымбатты тұлғасының үйлесімі, көйлектің інжудей құлпыруы, кітапқа үңілген жас қыздың нәзік қалпы терең психологизмге толы бейнелеуімен баурап алады.